Basta ordinà on quajcoss

De on poo de temp in chì
diventi milionaria
par quasi tutti i dì!

Robba straordinaria:
voo giò a gurdà la posta,
diventi proprietaria

nemmen a fall apposta,
de tanti bei milion,
basta che sia disposta

a fà on’ordinazion!
Nomm e cognomm, el mè,
tutt scritt a letteron

“Sciora, la voeur savè
se l’è che l’ha vinciuu?
E quanto el poeu varè

el premi ottegnuu?
La scancella l’argent
e se sotta, sconduu,

guardand attentament
lee la troeuva el sò “tris”
l’ha vinciuu certament!

Mì sont in paradis,
son mì la fortunada,
el destin l’ha decis!
 

E inscì, tutta ciappada,
scrivi l’ordinazion
per veggh ona mansciada

de or e de milion
e inoltre quell’anell
che l’è la mia ambizion.

Oh, mamma, ‘me l’è bell
però anca el vison,
quasi scernissi quell

m’el dann, oltre ai million
come premi sicur
e foo l’odinazion!

Quasi, per fà i frittur
toeuvi ona padella,
oppur on netta-mur

per fà diventà bella
la sala de disnà:
la pararà pù quella!

Oppur, voo drée a pensà:
on liber mai leggiuu
che, quand el rivarà,

el tegni saraa sù
dent in la libreria
in del repart lassù
 

E, piena de legria,
spedissi el mè bigliett
de la vinci-mania.

E chì gh’è on bell spillett:
riva la mia sorella
e come per dispett

la dis che in la casella
anca lee l’ha troaa
quella notizia bella

e l’ha giamò ordinaa
on para de sciavatt
ch’hinn per el mè cugnaa.

Insomma, andemm giò piatt.
dopo trì o quatter dì,
riva, de quei malnatt

on pacchettin per mì
e per la mia sorella
e certo induinii

‘me finiss la storiella!
Inutil la parolla,
chè, dent in la casella,
gh’emm dùu anelitt de tolla.