|
|
Dess gh'el domandi a lor
Hinn andaa
via per semper vun a vun
segond la dura legg de la natura,
obbligazion de sopportà el dolor
che adasi el passa e par ch’el se smorza.
Poeu, a pocch a pocch, de quella gran fiammada,
domà la scener, la rassegnazion,
‘na scener grisa, missa da ona part
freggia e gelada, abitudin ciamada.
Ma a on tratt, on dì, te voeuret regordà
quajcoss che l’è passà,
on quaj particolar desmentegaa:
dess gh’el domandi a lor...
La grisa scener l’è ancamò buienta,
on infogass a on tratt del tò dolor
e l’improvvisa, forta percezion
che crudelment par ch’el coeur la desfa.
Dess gh’el domandi a lor...
“Stupida!”... Gh’è pù nissun.
|