El titol? M'el regordi pu'!

Mì semper hoo invidiaa
Pico de la Mirandola,
specie quand seri a scola
e dovevi studià.

Cuntaven ona storia:
“Bisogna esercitalla,
‘sta vigliacca memoria!”
Ma l’era ona gran balla!

Gh’hoo ona memoria strana,
‘na memoria a metà,
l’è forsi ona condanna,
oppur l’è de invidià?

Quand ona robba bella
la me colpiss al coeur,
la slisa minga via,
la me tegn compagnia,

Ma come ona farfalla,
l’offesa ricevuda
la venn desmentegada,
la vola via leggera.

Post sciptum important:
hoo miss negher su bianch,
se nò desmentegavi
sto fatto interessant.