Gh'era on mur

Ogni tant in del ciel
diventaa color del piomb,
ona maggia de rosa
d’improvvis la compar,
la te fa l’oggiolin

e del sô un tocchelin
el riess a sgarbià
nivol negher lassù,
‘me cavej don gigant
inrabii e prepotent

El diventa sorris
el dolor de la gent
perchè basten freguj
de speranza de bell,
per fà i anim content.

A la fin de ‘sto ann
on quajcoss s’è movuu:
di freguj on poo dolz
su la torta inscì amara
che se devom spartì.
 

Al primm colp de piccon
sora on mur de vergogna
ch’el tegniva divis
i fradej da i fradej,
tutt el mond l’ha gioii

Tucc insema emm basaa
quej tocchej de cement
ancamò ross de sang,
chè ogni tocch de quadrell
el voeur dì “Libertà”

E quand l’è contentezza
la partecipazion
alla gioia di alter
ch’eren minga tò amis,
l’è del sô la vittoria.