Come l’è bell piang per quajcoss de bell,
quand i lacrim scarlighen a incontrà
i laver che sorriden,

piang de commozion, senza magon
a vedè el mar, on fior, el can de l’orb
ch’el varda el sò padron,

per ‘na canzon, ma senza nostalgia,
o adasi, adasi de felicità
per voress ben in duu.

In ‘sti moment, el coeur l’è pussée grand
el voraria romp i cadenn
de la preson, per scoeud la sed.

Hinn inscì amar i lacrim de la vitta:
tanti, quei che compagnen el dolor,
o che se veden nanca,

ma ‘na quaj volta hinn di lacrim dolz,
‘penna dò o trè, però pussée prezios,
e allora l’è bell piang!