La psicanalisi
 

Adess l’è moda fass analizzà
e sentiss dì quel che te penset tì:
te seet alegher, adrée a ziffolà,
oppur te pianget, te se drée a patì,
in del psicanalista ciappa e va!

La colpa del tò piang e del tò rid,
te disaran che l’è del tò papà,
che, quand te seret piscininna inscì,
on dì, tì te gh’hee dii “Mi voo a giugà!”
e lù, per punizion, te l’ha proibii.

Inscì gh’è semper ‘na risposta scura
per ogni tò penser che l’è inscì ciar,
perchè se tì t’el set qual è el tò mal,
te fann vegnì el dubbi e la paura
che te see minga poeu tanto normal.

I robb che prima hoo dii, m’hinn vegnuu in ment
perchè mì, stamattina, per la strada,
hoo vist ona veggetta che l’andava
col sò cagnin brutt vecc e sciabalent
 

e lù el gh’aveva in bocca on sacchettin,
la spesa per lor duu de portà a cà;
me son fermada a guardai on ciccin
e tutt a on tratt el coeur el s’è slargaa,

perchè in la donna e in del bastardott,
giuri che hoo vist ‘na gran soddisfazion
e inscì, per ona robba de nagott,
piangevi indepermì de commozion.

E allora, stamattina, mì hoo pensaa:
“Perchè la me fà piang ‘na robba inscì ?
Chi me conven, per veggh ona risposta,
corr anca mì a famm analizzà!”