Mirella Porta
 
 

Serena*

Se in de la vitta el gh’ha importanza el nomm,
se ‘l vinciarà l’amor senza egoismo,
se contra tutta la psicologia,
te rivett nò verament a patì,

se savarann vorett ben senza guerra
e i tò bei oeucc vedarann di sorris,
se finalment, finida la tempesta,
te podaret anca tì giugà al sô,

quand tutt el mond el desmentegharà
e sol quatter coeur battarann per tì,
senza ripicch, ma domà per amor
e sarann bon de cascià giò el magon...

(perchè ancamò voeuri cred in di favol
che me cuntaven quand seri tosetta,
doe i personagg senza colpa o peccaa
viven per semper feliz e content...)

tì che te fee, per adess, domà pena,
oh, principessa oriental, oeucc a mandorla,
nomm inscì dolz, compagn del tò faccin,
tì te saree “Principessa Serena”
 

*(SERENA) scritta in occasione della vicenda della piccola Serena Cruiz, adottata da una famiglia e contesa da un’altra.

 
 

Poesia Milanese

 Home | Labor. Odontotecnico | Varie |"Il Calderone"| Per contattarci | Chi siamo |Mappa sito|