El mè navili

Navili de Milan,
te me piasevet nò
quand son vegnuda a stà
de cà sora de tì.

Ma poeu gh’hoo vorsuu ben
al tocchelin ch’el scorr
denanz al mè poggioeu,
con rent el verd di pràa;

de là, la ferrovia,
ma nò internazional,
el treno el va in Piemont,
duu pass del mè Milan,

on pràa pien de cespugli,
de sces e d’alberej :
fior bianch a primavera,
on presepi a Natal

e duu conili bianch,
i orecc smagiaa de negher,
pien de felicità,
hinn i padron del pràa.

Solitari anedin,
da la darsena, ier,
fina chì l’è rivaa,
doe comincen i pràa.

Quest chì l’è el mè Navili,
doe mì guardi speggiass
on treno, el verd di pràa
e duu conili bianch.

 Novembre 2002