"La cà la nascond, ma la roba nò "
me l’ha dit ona mia amisa l’altrer,
perché mì seri disperada’ ohibò
a cercà robb miss via sorapenser.

Anca la nonna, in ment m’è vegnuu,
la me spiegava ona certa manera
per ritroà quell che avevi perduu
che poeu el saltava foeura vers la sera.

" Prega Sant Antoni" la me diseva
e certi volt la gh’aveva reson.
perché certi volt propi succedeva
ricev del santo la soddisfazion.

Alter sistema a nun tramandaa
dai noster vecc con la soa esperienza
sì, l’è quell de piantà lì de cercà
e de savè spettà con la pazienza

che poeu a on tratt, quand tì t’el cerchett pù
e che te l’hee ormai desmentegaa,
tell lì, dent on sacchettin de velù,
el te fa oggina l’anellin cercaa.

Ma mì, purtropp, l’è ormai ‘na settimana
che cerchi di robb che avevi compraa
e sto penser l’è per mì ‘na condanna
che par propi el me fa nò requià

Me son rassegnada " Niente da far! "
Ma quanti alter robb , gent, hoo troaa:
la mia pagella, quinta elementar.
on mè diari de tanti ann fa

‘ na tovajetta a metà ricamada
coi sò coton faa su in d’on sacchettin,
‘na pigottina tutta spettinada
e vecc centesim dent on scatolin.

Hinn tanti robb che gh’hann minga on valor,
servissen a nagott, certo se sa,
però al mè coeur gh’hann daa tanto calor
e m’hann davvera tanto consolaa.

I robb che mì cercavi j hoo nò troaa,
el dubbi el gh’è d’avei nanca compraa,
oppur che tutti i metodi hinn sbagliaa.
Però mì, adess, gh’hoo i cassett ordinaa.

luglio 2001